Lajme lojërash

Sony prezanton zyrtarisht PlayStation 4

Feb 21 2013
0 Shpërndarje
Sony prezanton zyrtarisht PlayStation 4

Më në fund, pritja e fansave për PlayStation 4 ka mbaruar. Sony prezantoi zyrtarisht PlayStation 4 në eventin që u mbajt të mërkurën, i dedikuar totalisht për konsolën e gjeneratës së tardhshme. PlayStation 3, paraardhësi i atij që do të kemi në treg duke filluar nga ky vit, u lançua për herë të parë në nëntor 2006. “Dhoma e ndenjes nuk është më qendra e universit të PlayStation; tashmë është lojtari,” u shpreh Andrew House, CEO i Sony Computer Entertainment.

“Ne besojmë se PlayStation 4 shkon një hap më larg në konceptimin e një konsole.” Arkitekti i sistemit, Mark Cerny, shtoi se Sony kishte filluar të punonte me zhvillimin e PlayStation 4 shumë pak kohë pas prezantimit të PlayStation 3. Gjenerata e katërt, ka procesor X86, GPU tepër të avancuar si dhe kujtesë të unifikuar 8 GB. Konsola do të ketë edhe një kontrollues (komandues) DualShock, i cili do ketë një pjesë me prekje (touchpad), një buton për shpërndarje (share) si dhe një hapësirë për lidhje me kufjet direkt nga kontrolluesi. Identifikimi i lojtarëve bëhet përmes një shiriti me dritë në pjesën e pasme të kontrolluesit ndërsa kamera 3D në konsolë gjurmon kontrolluesit e lidhur me të. PS4-controller

Lojërat që luhen në PlayStation 4 mund të ndërpriten thjesht duke shtypur butonin “power” dhe mund të rifillohen sërish – në momentin ku i keni lënë – duke e shtypur përsëri butonin “power”.

Lojërat mund të shkarkohen gjithashtu në sfond dhe gjatë kësaj kohë ju mund të vazhdoni të luani lojëra të tjera. Në këtë mënyrë, evitohet pritja. Konsola ka gjithashtu një kompresues për videon, e cila lehtëson proçesin e shpërndarjes së videoklipeve të lojës me miqtë tuaj.

Nëse përballeni me vështirësi në një nivel të caktuar, mund të lidheni virtualisht me një mikun tuaj përmes uebit dhe ai mund të marrë “në dorë” kontrolluesin duke ju ndihmuar. Për më tepër, mund të transmetoni lojën tuaj tek miqtë dhe ata të bëjnë komente në ekran – nëse ju i lejoni.

Në PlayStation 4 përfshihet edhe një funksion Remote Play, i cili ju ndihmon ta kaloni lojën nga televizori në PlayStation Vita. PS4 remote playPak a shumë e ngjashme me Wii U: Remote Play u mundëson për shembull fëmijëve të shohin një film në TV, ndërkohë që ju luani një lojë në Vita. Pasi ata të shkojnë për të fjetur, ju mund ta kaloni lojën në televizor dhe të vazhdoni të luani në momentin ku e keni ndërprerë lojën.

Konsola më e suksesshme e Sony-t deri më sot, vazhdon të mbetet PlayStation 2, e cila u prezantua në mars 2000. Kompania ka deklaruar se ajo ka shitur mbi 150 milionë kopje gjatë 13 viteve të fundit, ndërkohë që janë shitur mbi 1.5 miliardë lojëra për të. Nëse bëjmë një krahasim me PlayStation 3, shifrat e tij janë pothuajse sa gjysma e PlayStation 2, me 70 milionë kopje në 7 vite që nga lançimi. (GameWorld Albanian)

Lajmet e fundit>