Gjatë periudhës prill-qershor 2014 janë shitur 1.1 milionë konsolla Xbox One dhe Xbox 360

Microsoft ka shitur në total 1.1 milionë konsolla Xbox One dhe Xbox 360 gjatë tremujorit të katërt fiskal (1 prill – 30 qershor), lajmëroi kompania gjatë të martës në kuadër të raportit të saj për fitimet e arritura. Siç ka qenë e zakonshme me statistikat e shitjeve që Microsoft ofronte për konsollat për lojëra këtë vit, është e rëndësishme të theksohet që termi “të shitura” i referohet numrit të konsollave që janë shitur për shitësit me pakicë. Kjo dallon nga numri i konsollave që janë shitur tek konsumatorët – shifër kjo e cila nuk është lajmëruar si e përditësuar nga Microsoft që nga 31 dhjetori, kur u tregua që Xbox One ishte shitur në 3 milionë kopje deri atëherë.

1.1 milionë konsolla të shitura paraqesin një rënie në krahasim me tre muajt e kaluar, kur Microsoft-i shiti 2 milionë konsolla (1.2 milionë prej të cilave ishin Xbox One). Kompania tha që “ka ulur inventarin e kanalit” gjatë tremujorit më të fundit, duke iu referuar planeve që kishte lajmëruar në muajin prill për ngadalësim të shitjeve për t’ju mundësuar shitësve me pakicë shitjen e konsollave që ata tashmë kanë në raftet e dyqaneve.

Pa ofruar ndonjë shifër të saktë, Microsoft javën e kaluar lajmëroi që shitjet e Xbox One gjatë qershorit janë rritur për më tepër se dyfishi i shitjeve të arritura gjatë majit pas lëshimit të modelit pa Kinect, i cili kishte edhe çmimin prej 400 dollarë. Modeli doli në shitje më 9 qershor dhe uli çmimin e sistemit në nivelin e çmimit të PlayStation 4 të Sony-t, që ka tejkaluar me numër të shitjeve Xbox One-in deri tani. Deri më 6 prill, PlayStation 4 ka shitur 7 milionë njësi në mbarë botën. (GameWorld Albanian)